Хэлена Рубінштэйн, якая паходзіла з яўрэйскага Падгужа, увайшла ў свет раскошы, мастацтва і сучаснай б’юці-індустрыі і стала адной з самых заўважных і ўплывовых жанчын ХХ стагоддзя. Наша экспазіцыя распавядае гісторыю асобы, якая зрабіла прыгажосць інструментам самавыяўлення, незалежнасці і сацыяльнага росту. Хэлена стварыла ўласную легенду, што бытавала між Кракавам, Парыжам, Лонданам і Нью-Ёркам. 

Кар’ернае развіццё

Хэлена Рубінштэйн была заснавальніцай адной з першых глабальных касметычных імперый XX стагоддзя. Ад Аўстраліі да Нью-Ёрка яна будавала брэнд, які распрацоўваў не толькі касметыку, але і сучасную мову раскошы, рэкламы і жаночых памкненняў. 

На выставе можна пабачыць:

• гістарычную касметыку брэнда “Helena Rubinstein”,
• рэкламныя матэрыялы,
• праекты ўпаковак,
• архіўныя матэрыялы, звязаныя з развіццём кампаніі,
• фатаграфіі і дакументы, якія адлюстроўваюць зараджэнне сучаснай б’юці-індустрыі.

Гэта гісторыя бізнес-лэдзі, якая разумела сілу брэнда і іміджу задоўга да з’яўлення сацыяльных сетак.

Сацыяльнае жыццё

Хэлена Рубінштэйн належала да ліку самых уплывовых жанчын сваёй эпохі. Яна была калекцыянеркай мастацтва, заўсёдніцай салонаў і майстрыняй самавыяўлення. Хэлена свядома стварала свой вобраз праз моду, фатаграфію, інтэр’еры і відовішчную раскошу.

На выставе можна пабачыць:

• фотаздымкі з яе асяроддзем,
• адзенне і аксесуары,
• прадметы, звязаныя з яе калекцыяй твораў мастацтва,
• архіўныя партрэты,
• матэрыялы, якія паказваюць, як яна стварала свой публічны вобраз.

Шматлікія здымкі былі рэтушаваныя і старанна зрэжысаваныя самой Рубінштэйн — яна выкарыстоўвала тыя тэхнікі стварэння іміджу, якія сёння мы звязваем з культурай інфлюэнсераў і сацыяльных сетак.

Прыватнае жыццё

За публічным вобразам Хэлены Рубінштэйн хавалася Хая Рубінштэйн — дзяўчына, якая выхавалася ў яўрэйскай сям’і ў Падгужы пад Кракавам.

Выстава даследуе напружанне паміж прыватным жыццём і створаным іміджам, паміж штодзённасцю і легендай, паміж памяццю і перформансам. Асабістыя фатаграфіі, рэліквіі і архіўныя матэрыялы дазваляюць пазнаёміцца з менш афіцыйным бокам адной з самых захапляльных жанчын XX стагоддзя.

Адчуванне і памяць

Выставу адкрывае араматычная праца “Хая. Пачатак прыгажосці” аўтарства Агнешкі Сакс. Гэта водар, натхнёны светам дзяцінства і маладосці Хаі Рубінштэйн — матэрыяльнасцю інтэр’ераў, штодзённымі рытуаламі і памяццю месца.

Кампазіцыя не рэканструюе нейкі канкрэтны гістарычны пах, а стварае сэнсарную інтэрпрэтацыю пачатку гісторыі Хэлены Рубінштэйн — моманту, калі будучая стваральніца б’юці-імперыі яшчэ застаецца Хаяй.

Калекцыя Музея POLIN 

У фондах Музея гісторыі польскіх яўрэяў POLIN знаходзіцца ўнікальная калекцыя, звязаная з Хэленай Рубінштэйн. Выбраныя экспанаты можна пабачыць онлайн на партале “Калекцыі Музея POLIN”.